الواد محمد من صغره شاطر وزينة الولاد
اتولد في الزقازيق واتعلم في أبو حماد
محمد دمه خفيف والنكتة يقولها يضحك العباد
كبر واتخرج من الجامعة بكالوريوس اقتصاد
جاله عقد في السعودية ومن هنا بدأ الجهاد
سنتين وقال لأمه اخطبي لي سعاد بنت الحاج مراد
وماله سعاد واعية ربنا يرجعك مجبور للبلاد
بعّت توكيل كَتْب الكتاب وأنا كنت عليه من الشهّاد
جريت الأيام وبقى عنده خمسة من الأولاد
زياد وهالة وناصر وسهاد ونُهاد
الحج محمد كان يقول النكتة يقولوا له تاني يا بو زياد
الحاج محمد وأسرته عاشوا عيشة أسياد
الرزق وفير وبعاد عن المشاكل والحساد
الدوام لله اتوفت أمه وبعدها أبوه وربى دقنه حداد
الحاج محمد بيحب ولاده وعلمهم على الله الاعتماد
زياد خد الثانوية نزلهم مصر مع أمهم سعاد
الحاج محمد عاش الوحدة بشكل جاد
بقى يعاني ومن التفكير جاله في بطنه ألم حاد
ضاعت منه النكتة مع انه لها من الرواد
عاش في اكتئاب وشعر انه من الغربة ما خدش المراد
بدأ قلبه يتعب وبعض الشرايين جالها انسداد
هو اتغرب علشان السعادة وشافها بالكاد
كان يحب الاستقرار وجمعت العائلة اللي تسعد الفؤاد
مراته الواعية اشتريت قطعة أرض رخيصة من المزاد
قالت له في التليفون حا بني عمارة يحكوا عنها العباد
خمس أدوار ودكاكين وحاسميها برج أبو زياد
وحا أحجز أربعة شقق كبيرة للأولاد
الحاج محمد صرخ وقال لها يا سعاد ليه العناد
أنا عايز أروح وأعيش وسطكم وكفاية هنا قعاد
قالت له ربنا يعطيك الصحة ماهو كله للأولاد
ما أنت قاعد مرتاح أكلك ولبسك كله استيراد
روح اعمل لك عمرة ولأبوك ولأمك وللأجداد
افرج عن نفسك بالصلاة في الحرم دي الصلاة للدين عماد
ما تنساش تبعتلي فلوس للنجار والمهندس والحداد
وساعة وكاميرا لزياد وموبايل وكمبيوتر لسهاد
المباني مصاريفها كتير ابعت يا حاج امداد
الحاج محمد الدنيا اتسدت في وجه وبقت سواد
زاد مرضه واتحرم عليه كتير من الزاد
راح الكلام والضحك وبقى تفكيره في العيال البعاد
كان عنده بعض الفكر والاعتقاد
ان أسرته اتحسدت واتملكوا منها الحسّاد
راحت الابتسامة والنكتة اللي كانت تضحك العباد
تعبه قلبه خده على المستشفى زميله ميلاد
اتبنى وخُلص برج الحاج محمد أبو زياد
وكان من قلب الحاج محمد السداد
لا شافه ولا اتمتع وكأنه كان مع الموت على ميعاد
حسب وصيته نزلوه متكفن في صندوق وشحنوه للبلاد
الحاجة سعاد صبغت كل هدومها سواد
وعاشت باقي عمرها حزينة وفي حداد
كل ما تسمع افتكرني لحظة حلوة تفتكر إنهم كانوا بعاد
وتسوى ايه الدنيا وانت مش معايا قلبها يتحرق ويبقى رماد
سلمت روحها لربها وسابت الولاد وسهاد ونهاد